Átaksverkefni David Lynch á Íslandi
Hátt í áttahundrað manns hafa lært Innhverfa íhugun undanfarið

Námskeið í Innhverfri íhugun hafa nú staðið yfir frá því í júlí á síðasta ári og hafa um hátt í 800 manns lokið þeim. Þessi mikli fjöldi vekur vonir um að hægt verði að mynda nægilega stóran hóp iðkenda til þess að hafa veruleg áhrif á samfélagið. Svipaður fjöldi og lært hefur á undanförnum mánuðum bíður þess að komast á námskeið á nýju ári.

Námskeiðin hafa verið niðurgreidd af Íslenska íhugunarfélaginu og Sjóði David Lynch í New York og kosta tímabundið aðeins kr. 10.000. Reiknað er með að hægt verði að bjóða námskeiðin á þessu verði fram á sumar.

Sex sérmenntaðir kennarar hafa sinnt kennslu í Innhverfri íhugun frá því í byrjun júlí. Þeir eru: Ari Halldórsson, kennslustjóri lista- og fjölmiðlasviðs Borgarholtsskóla, Árni Sigurðsson veðurfræðingur á Veðurstofu Íslands, Kristinn Arnbjörnsson tæknifræðingur hjá Gatnadeild Reykjavíkurborgar, Ivanka Sljivic leikskólakennari og Reynir Santuar þýskukennari hjá Mími. Auk þess hefur þýskur kennari, Elke Jennrich - sem kenndi Innhverfa íhugun á vegum Íslenska íhugunarfélagsins á árum áður - komið tvisvar hingað til lands til að aðstoða við kennslu. Um þessar mundir nýtur félagið jafnfram aðstoðar dansks kennara að nafni Lisbet Nörgaard sem meðal annars aðstoðar við framhaldsfyrirlestra, kannanir og helgarnámskeið.