Kæri viðtakandi.

Útgáfa Tíðindanna hefur verið stopul undanfarið og er þar er helst um að kenna minni tíma kennara nú en áður. Allur „frítími“ okkar fer í að kenna þeim sem bíða þess að læra Innhverfa íhugun en sem stendur sinnum við öll annarri vinnu meðfram. Því takmarkast útgáfa Tíðindanna við áríðandi tilkynningar og auglýsingar. Full þörf er þó á vandaðri útgáfu með fræðandi og hvetjandi efni og því þiggjum við alla aðstoð ritfærs fólks og þeirra sem góðir eru að gera vefsíður og fréttabréf. Einnig auglýsum við eftir fólki sem tilbúið er til að þýða og texta myndbönd (ekki endilega sami einstaklingur þó). Fyrirlestrar af myndböndum eru mikilvægur þáttur í starfsemi okkar og er orðið brýnt að koma þýðingu þeirra í gott horf.

Áætlun David Lynch og Íslenska íhugunarfélagsins um að kenna fjölda fólks Innhverfa íhugun rætist smátt og smátt. Kennslan gengur vel og sífellt bætast nýir einstaklingar á listann langa. Áratuga rannsóknir sýna að iðkun Innnhverfrar íhugunar hefur veruleg áhrif samfélagið í átt til meiri samstillingar, velferðar, heilbrigðis og hamingju. Hver einstaklingur sem nú hefur lært tæknina gegnir því mikilvægu hlutverki í því að lyfta þjóðarvitundinni upp úr þeim öldudal sem hún rataði í. Áríðandi er að halda iðkun íhugunarinnar áfram gegnum þykkt og þunnt og fá aðstoð og hvatningu strax og þörf krefur. Til þess er einkakönnun, dagleg hópiðkun (sjá hér fyrir neðan), miðvikudagsfundir og helgarnámskeið.

Elke Jennrich, sem komið hefur nokkrum sinnum frá Þýskalandi til að kenna, er nú stödd hér á landi til 11. mars. Þeir sem vilja ná tali af henni og fá könnun geta pantað tíma í síma 557 8008 hringt í farsíma 896 8508.

Með kveðju,
Ari Halldórsson

Nýtt:
Hópíhugun á virkum dögum kl. 17.20

Sú nýbreytni hefur verið tekin upp að hafa „opið hús“ og hópíhugun í Skúlatúni 2 fyrir iðkendur Innhverfrar íhugunar á milli kl. 17 og 18 á virkum dögum. Húsið opnar kl. 17 en hópíhugun hefst stundvíslega kl. 17.20 og stendur til 17.40. Þeir sem ekki ná að mæta tímanlega eða vilja byrja fyrr geta notfært sé íhugunarherbergin á staðnum frá kl. 17. Húsinu er svo lokað kl. 18 og er mikilvægt að íhugun sé þá lokið.

Helgarnámskeið eru ætluð iðkendum Innhverfrar íhugunar. Farið er út fyrir borgarmörkin og gist tvær nætur. Íhugun á helgarnámskeiðum veitir djúpa og endurnærandi hvíld í friðsælu umhverfi þar sem íhugað er meira en tuttugu mínútur tvisvar á dag undir leiðsögn og hlýtt á fyrirlestra með Maharishi. Lagt er af stað seinnipartinn á föstudegi og komið til baka síðdegis á sunnudegi.

Reynt er að halda kostnaði í lágmarki og einungis boðið upp á gistingu í tveggja manna herbergjum með baði. Verð á mann er kr. 15.000. Húsnæði, grænmetisfæði og kennsla er innifalið. Engar rútuferðir eru á staðinn en brugðist verður við óskum um ferðir þegar ljóst er hversu margir verða ekki á eigin bíl. Gott er að koma með léttan klæðnað með til að gera teygjuæfingar (yoga asanas) sem kenndar verða.

Síðustu tvö námskeið tókust afar vel og komust færri að en vildu. Gist er í veiðihúsum við Láxá skammt frá þjóðveginum norðan megin við brúna.

Skráið ykkur hjá Örnu á skrifstofu félgasins milli kl. 13-16 alla virka daga eða með því að senda tölvupóst á arna@ihugun.is

Framhaldsfundir eru alla miðvikudaga kl. 20 í Skúlatúni 2. Á framhaldsfundum er hópkönnun og þar gefst tækifæri til að ræða iðkun tækninnar og áhrif. Fundir sem þessir eru góðir til að viðhalda góðum árangri.

Fiskað í djúpinu
eftir David Lynch

Fiskað í djúpinu eftir kvikmyndaleikstjórann David Lynch fæst hjá Íslenska íhugunarfélaginu og kostar kr. 2.700. Allur ágóði af sölu bókarinnar rennur í styrktarsjóð til að greiða niður námsgjöld í Innhverfri íhugun. Með því að kaupa bók styður þú átaksverkefni David Lynch á Íslandi.

Gott er að mæta af og til í einkakönnun. Einkakönnun veitir reynslu af áreynslulausri íhugun sem er lykillinn að góðum árangri. Pantið tíma í síma félagsins: 557 8008 eða með því að senda póst á ihugun@ihugun.is
Farsímar kennara félagsins eru:
Ari Halldórsson, sími 820 2857
Árni Sigurðsson, sími 662 1362
Kristinn Arnbjörnsson, sími 693 2502
Ivanka Sljivic, sími 861 2394 (eftir kl. 16)
Reynir Santuar, sími 866 0726
Elke Jennrich, sími 896 8508

Einkakönnun er ókeypis fyrir þá sem hafa nýlega lært (2009 - 10) en kostar kr. 2.000 fyrir eldri íhugendur.